2021 წლის პირველ ნახევარში საქართველოს სავაჭრო ბრუნვამ სომხეთთან რეკორდულ მაჩვენებელს მიაღწია

საქართველოსა და სომხეთს შორის სავაჭრო ბრუნვამ 2021 წლის პირველ ნახევარში (იანვარი-ივნისი) რეკორდულ მაჩვენებელს მიაღწია და 332.4 მილიონი აშშ დოლარი შეადგინა. აღნიშნული მაჩვენებელი მნიშვნელოვნად აღემატება 2020 წლისა (283.4) და 2019 წლის (281.9) მონაცემებს.

პანდემიის პერიოდთან შედარებით, სავაჭრო ბრუნვა სომხეთსა და საქართველოს შორის 2021 წლის პირველ ექვს თვეში 17.2%-ითაა გაზრდილი. საქართველოდან სომხეთში ექსპორტირებული საქონლის ჯამურმა ღირებულებამ 101 მილიონი აშშ დოლარი შეადგინა. სომხეთიდან იმპორტირებული საქონლის ღირებულება კი 231.3 მილიონ აშშ დოლარს უდრის.

ყველაზე დიდი რაოდენობით საქართველოდან სომხეთში ექსპორტზე ხორცი და თევზი გავიდა. 2021 წლის პირველ ექვს თვეში ამ საქონლის ღირებულებამ 5.4 მილიონი აშშ დოლარი შეადგინა. საინტერესოა, რომ სპირტებსა და ალკოჰოლურ სასმელებზეც ექსპორტის საკმაოდ დიდი წილი მოდის. საქართველოდან სომხეთში ექსპორტირებული საქონლის ჯამური ღირებულება წინა წლის იმავე პერიოდთან შედარებით 19%-ით არის გაზრდილი.

საქართველოში იმპორტირებული საქონლის მონაცემები საინტერესო სურათს ასახავს. სომხეთიდან საერთო ჯამში იმპორტირებული 231.3 მილიონი აშშ დოლარის საქონლის დაახლოებით 85%-ს სპილენძი და მისი კონცენტრატები შეადგენს. ამ უკანასკნელის იმპორტის სრული ღირებულება წლის პირველ ექვს თვეში 198.7 მილიონ აშშ დოლარს უდრის.