უკვე ტრადიციულად, მარტის თვე „VELI.store“-ზე მეწარმე ქალებს ეთმობათ. მიმდინარე წელს საქართველოში წამყვანმა ელექტრონული კომერციის კომპანიამ, მეწარმე ქალები და კონტენტ-კრეატორები საერთო მიზნის, ქალთა გაძლიერების გარშემო, გააერთიანა. ერთი თვის განმავლობაში, ინფლუენსერი ქალები მეწარმე ქალთა მცირე ბიზნესების შესახებ საკუთარ პლატფორმებზე კონტენტს შემოგვთავაზებენ და ამით ხელს შეუწყობენ მათ განვითარებასა და ცნობადობის ზრდას.
როგორც Forbes Georgia-სთან საუბრისას „ველის“ ბრენდის ხელმძღვანელი თათია კარიაული აღნიშნავს, საზოგადოებაზე პოზიტიური გავლენის მოხდენა ბრენდის პოლიტიკის განუყოფელი ნაწილია, ქალთა გაძლიერების მიმართულებით აქტიური მუშაობა კი სწორედ ამ მისიას ემსახურება. მსგავსი ტიპის კამპანია, რომლის ფარგლებშიც ელ.კომერციის პლატფორმაზე მეწარმე ქალთა შესახებ ბლოგები გამოქვეყნდა, გასულ წელს ჩატარდა, დასახულ მიზანსაც მიაღწია და უკვე ყოველწლიური ხასიათიც მიიღო.
დღეისთვის „VELI.store“-ის პლატფორმაზე არსებობს ცალკე კატეგორია – „მხოლოდ ქართული“, რომელიც ასზე მეტი მეწარმის პროდუქციას აერთიანებს, მათი 90% კი სწორედ ქალები არიან. გარდა ამისა, მიმდინარე კამპანიისთვის, „ველიმ“ სპეციალური კატეგორიაც შექმნა, რომელშიც მხოლოდ ქალების მიერ წარმოებული პროდუქტები წარმოგვიდგინა.
თათია, თავდაპირველად კამპანიის შესახებ საუბრით დავიწყოთ: რას გულისხმობს, რა მიზანს ემსახურება და როგორ გაჩნდა მისი შექმნის იდეა?
„ველი“ ჯერ მხოლოდ ორი წლისაა, თუმცა ქალთა მხარდაჭერის კამპანიამ ჩვენთვის უკვე ტრადიციული ხასიათი მიიღო. მარტის თვე „ველიზე“ სწორედ მეწარმე ქალებს ეძღვნებათ და ეს, რაღაც მხრივ, ჩვენი კომპანიის მისიასთანაცაა დაკავშირებული. კერძოდ, დაარსების დღიდანვე, „ველიმ“ მთავარ მისიად საზოგადოებაში პოზიტიური გავლენის შექმნა დაისახა და ამას მუდმივად, სხვადასხვა მიმართულებით ახერხებდა. ერთ-ერთი კი სწორედ ქალების და ამ შემთხვევაში კონკრეტულად მეწარმე ქალების გაძლიერებაა.
შესაბამისად, წლევანდელი კამპანიაც ჩვენთვის ორგანული გამოდგა. „ველიზე“ გვაქვს კატეგორია „მხოლოდ ქართული“, რომელიც ასზე მეტი მეწარმის პროდუქციას აერთიანებს და მათ შორის 90% ქალია. მხოლოდ ეს მონაცემიც ცხადყოფს, თუ რამდენად დიდი პოტენციალი აქვთ მეწარმე ქალებს ქართულ ბაზარზე და რამხელა მნიშვნელობისაა ამ გზაზე მათი მხარდაჭერა და ხელშეწყობა.
„ველიში“ გვჯერა, რომ განვითარებისთვის აბსოლუტურად ყველაფერს პრაქტიკული მიდგომაც სჭირდება. სწორედ ამიტომ გადავწყვიტეთ გადაგვედგა ქმედითი ნაბიჯები და მოგვეფიქრებინა გადაწყვეტა, რომელიც რეალურ სარგებელს მოუტანდა მეწარმე ქალებს.
ჩვენი ინდუსტრიიდან და არსებული მონაცემებიდან გამომდინარე, ნათლად ჩანს, რომ მათთვის ერთ-ერთ მთავარი გამოწვევა დაბალი ცნობადობა და ციფრულ სივრცეში ხილვადობის ნაკლებობაა. ხშირ შემთხვევაში, სტარტაპერ და მეწარმე ქალებს საჭირო რესურსი არ გააჩნიათ და მხოლოდ საბაზისო საჭიროებების დაკმაყოფილება შეუძლიათ – მასშტაბური ცნობადობის შესაქმნელად არ ჰყოფნით არც ადამიანური და არც ფინანსური რესურსი.
ჩვენც სწორედ ამ გამოწვევებისთვის გვსურდა გვეპასუხა და წამოვიწყეთ კამპანია სახელწოდებით, „ქალების მხარდაჭერის ველი“, რომელშიც მეწარმე ქალები და ინფლუენსერი, კონტენტ-კრეატორი ქალები გავაერთიანეთ. კამპანიის ფარგლებში, ერთთვიან ჭრილში, თითო მეწარმე ქალს კონკრეტული ინფლუენსერი ქალი, თავისი სოციალური არხების საშუალებით პოპულარიზაციას გაუწევს, გააცნობს თავის აუდიტორიას, შექმნის მის შესახებ კონტენტს და მსგავსი ტიპის აქტივობებით დაეხმარება, გავიდეს მასშტაბურ სეგმენტზე და თავისი ბრენდის ცნობადობაც გაზარდოს.
გარდა ამისა, ამ თვის განმავლობაშიც, თვითონ „ველიზე“ მაქსიმალურადაა გაზრდილი მეწარმე ქალების პროდუქციის ხილვადობა. შეიქმნა სპეციალური კატეგორია და ნიშანიც, რომელიც პლატფორმაზე, სურვილის შემთხვევაში, მეწარმე ქალების მხარდაჭერას კიდევ უფრო ამარტივებს.
განსაკუთრებით საინტერესოა ის ფაქტი, რომ კამპანია სწორედ თვითონ ქალთა ერთმანეთის მხარდაჭერას ეფუძნება: რამ შთააგონა „ველი“, შეექმნა მათ თანამშრომლობაზე დამყარებული პროექტი?
პრინციპში, ეს კონცეფციაც ბუნებრივად მოვიდა, თუმცა მგონია, რომ ამის უკან ორი მთავარი მიზეზი იდგა. პირველი, ვფიქრობ, ჩვენ ყველას მაინც გვჯერა, რომ ქალებს უკეთ გვესმის ერთმანეთის და ის გამოწვევები და ბარიერებიც, რაც შეიძლება მათ გზაზე დახვდეთ, ჩვენთვის უფრო ნაცნობი და ხელშესახებია. იქნება ეს სისტემური გამოწვევები, ფინანსურ რესურსებზე წვდომის ნაკლებობა თუ ის ფაქტი, რომ მეწარმე ქალებს თავიანთ საქმიანობასთან ერთად სხვა ძალიან ბევრი, მათ შორის საოჯახო საქმის შეთავსებაც უწევთ. შესაბამისად, მიგვაჩნია, რომ ინფლუენსერი ქალები უფრო მეტად ემპათიურები არიან ამ საკითხის მიმართ და სწორედ აქედან წამოვიდა ეს იდეაც.
თუმცა ეს კამპანია თუ ერთი მხრივ მეწარმე ქალებს ემსახურება, რომელთა ნივთებიც „ველიზე“ უკვე განთავსებულია და იყიდება, მეორე მხრივ, არის ფართო აუდიტორიისთვის გათვლილი – სხვა ქალებისთვისაც ინსპირაციის შესაქმნელად. შესაბამისად, გადავწყვიტეთ, ორივე მხარე გვეჩვენებინა: ერთი მხრივ, მეწარმე ქალები და მეორე მხარეს ინფლუენსერი და კონტენტ-კრეატორი ქალები, რომლებიც თავიანთ სფეროში ასევე წარმატებულები არიან.
კამპანიის მონაწილეებზეც მოგვიყევით: ვინ არიან, რა კრიტერიუმებით მოხდა მათი შერჩევა?
შერჩევის საწყის ეტაპზე მთავარი კრიტერიუმი იყო, რომ მათი პროდუქტები წარმოდგენილი ყოფილიყო „ველის“ პლატფორმაზე. მაქსიმალურად შევეცადეთ, კამპანია სექტორების მიხედვით მრავალფეროვანი გაგვეხადა, ამიტომაც გვყავს სხვადასხვა სფეროს წარმომადგენლები: მათ შორის მეღვინეები, ქალები, რომლებიც სამკაულებსა და აქსესუარებს ამზადებენ, ტექსტილის სფეროში არიან წარმოდგენილნი და ა.შ.
რაც შეეხება ინფლუენსერებს, მათ ჩართვას კამპანიაში მოხალისეობრივი ხასიათი აქვს. თავადვე გამოხატეს მონაწილეობის სურვილი, რადგან სჯერათ, რომ მეწარმე ქალების მხარდაჭერა პირდაპირ კავშირშია ზოგადად საქართველოში ქალთა გაძლიერებასთან და ამავდროულად ქვეყნის ეკონომიკის ზრდაზეც დადებითაც მოქმედებს. თუმცა დაჯგუფებისას შევეცადეთ, მეწარმეების პროდუქცია და ინფლუენსერების კონტენტი მაქსიმალურად თანხვდენილი ყოფილიყო ერთმანეთთან, რაც ბევრად ორგანულს გახდიდა მათ თანამშრომლობასაც. მსგავსი მიდგომა, ერთი მხრივ, თავად ინფლუენსერებსაც უმარტივებს ბრენდზე საუბარს, ხოლო მეწარმე ქალები მათი საშუალებით უშუალოდ მათ სამიზნე აუდიტორიაზე გაჰყავს.
აქვე დავამატებთ, რომ მიუხედავად საკომუნიკაციო კამპანიის მცირე რესურსისა – რომელიც ჯამში ათ მეწარმე და ათ ინფლუენსერ ქალს აერთიანებს – „ველის“ კამპანია შეეხება ყველა მეწარმე ქალს ჩვენს პლატფორმაზე. კომპანიის ვებგვერდსა და აპლიკაციაში შეიქმნა სპეციალური გვერდი, სადაც მხოლოდ მეწარმე ქალების ბრენდებია წარმოდგენილი და ცენტრალური ადგილიც უკავია, რათა უფრო მეტმა ადამიანმა შეამჩნიოს და გაუმარტივდეს მათ სასარგებლოდ არჩევანის გაკეთებაც.
ამ ყველაფრიდან გამომდინარე კი, ზოგადად საქართველოში არსებული სურათიც უფრო საფუძვლიანად მიმოვიხილოთ: თქვენი აზრით, რა გამოწვევებს აწყდებიან მეწარმე ქალები ქართულ ბაზარზე და რაში ხედავთ გამოსავალს?
გაერთიანებული ერების ორგანიზაციის ქალთა ფონდის კვლევით, საქართველოში ქალები ქვეყანაში არსებული ბიზნესების მხოლოდ მესამედს ფლობენ, ან დამფუძნებლები არიან. გარდა ამისა, ქალთა ბიზნესები, როგორც წესი, შედარებით უფრო მცირე მასშტაბისაა, უჭირთ ახალ ბაზრებზე გასვლაც და წვდომის დამყარებაც. თავის მხრივ კი, ელექტრონული კომერცია საქართველოში ერთ-ერთი ყველაზე სწრაფად მზარდი და განვითარებადი ბაზარია, რის გამოც გვჯერა, რომ „ველის“ ჩართულობა ამ მიმართულებით ქალებს ათასობით მომხმარებლისკენ გზას გაუხსნის და დაეხმარება მათ, გაზარდონ თავიანთი ბიზნესის მასშტაბი და უფრო დიდ აუდიტორიაზეც გავიდნენ.
ზოგადადაც რომ მივყვეთ, ძალიან ბევრი ფინანსური, პოლიტიკური თუ კულტურული ბარიერი არსებობს საქართველოში მეწარმე ქალებისთვის. საზოგადოებაში მაინც ბოლომდე არ არის მიღებული, რომ ქალიც შეიძლება იყოს დამოუკიდებელი მეწარმე და მსგავსი სტერეოტიპების დარღვევა, ქალთა უკეთესი მომავლისთვის, აუცილებლად გვჭირდება. სწორედ ამ გაბატონებული ხედვის ცვლილება დავისახეთ მიზნად ჩვენი კამპანიის შექმნისას. პარალელურად კი მიგვაჩნია, რომ კერძო სექტორის მხრიდანაც წამოვა მსგავსი ინიციატივები და შემდგომ თაობებში ბევრად უფრო კარგ სიტუაციას მივიღებთ.
ისევ კამპანიას დავუბრუნდეთ: საინტერესოა, იქნება ეს ერთჯერადი ხასიათის, თუ მსგავს პროექტებს კვლავ უნდა ველოდოთ „ველისგან“?
ზოგადად, „ველიში“ გვჯერა და მეც მიმაჩნია, რომ მსგავსი ტიპის პრობლემები ერთჯერადად არ გვარდება და ის, რაზეც ბრენდი ლაპარაკობს და რისიც სწამს, ერთჯერადი არასდროსაა. შესაბამისად, აუცილებლად გავაგრძელებთ მსგავსი ტიპის კამპანიებს ქალთა მხარდასაჭერად – შეიძლება იდენტურს არა, თუმცა ჩვენი პლატფორმა ყოველთვის ღია იქნება მეწარმე ქალებისთვის.
აქვე გკითხავთ შარშანდელ პროექტზე: მეწარმე ქალების შესახებ ცნობადობის გასაზრდელად, გასულ წელს, „ველიმ“ მათ შესახებ ბლოგები შემოგვთავაზა. როგორ შეაფასებთ კამპანიის შედეგებს, მიაღწიეთ მიზანს, რომელიც დაისახეთ? შეგვიძლია, ეს მივიჩნიოთ მიზეზად იმისა, რომ „მხოლოდ ქართულის“ კატეგორიაში 90% მეწარმე ქალები არიან?
„VELI.store“ საქართველოში წამყვანი eCommerce-პლატფორმაა. შესაბამისად, ამ ეტაპზე, როგორც წესი, მეწარმე ქალები გვიკავშირდებიან, თუმცა ჩართულობის ზრდაზე გავლენა გასული წლის კამპანიამაც იქონია. ჩვენი აქტივობებით ქალებს დავანახეთ, რომ „ველის“ კარი მათთვის ღიაა და შარშან თუ მხოლოდ 15 მეწარმე ქალის პროდუქცია იყო განთავსებული პლატფორმაზე, ახლა უკვე მათი რიცხვი 100-მდე გაიზარდა. მაღალი მომართვიანობა გვაქვს მეწარმე ქალებისგან რადგან ხედავენ, რომ მსგავსი აქტივობებით იზრდება მათი ცნობადობაც და მათი პროდუქციით მომხმარებლის დაინტერესებაც.
საქართველოში, და არამარტო, ქალთა გაძლიერების საკითხი საკმაოდ კომპლექსური და მუდმივად აქტუალური საკითხია. ბოლოს გკითხავთ, რა არის „ველის“ გრძელვადიანი ხედვა ქალთა გაძლიერების მიმართულებით? შეძლებს თქვენი ინიციატივები, გახდეს უფრო მასშტაბური და გააერთიანოს საქართველოში არსებული სხვა წამყვანი კომპანიებიც ამ მიზნის გარშემო?
„ველიში“ მუდამ ღია ვართ კოლაბორაციებისთვის და ამ ეტაპზეც რამდენიმე დიდ ბრენდთან ვთანამშრომლობთ, რათა ბევრად მასშტაბური სახე მიეცეს ჩვენს კამპანიას. რა თქმა უნდა, ქალთა გაძლიერების მიმართულებით გრძელვადიანი ხედვებიც გვაქვს. გეთანხმებით, რომ საკმაოდ კომპლექსური საკითხია და საბოლოო შედეგის მისაღწევად მუდმივ მუშაობასაც მოითხოვს. ამჟამად, ჩვენი პარტნიორია „თიბისი ბიზნესისთვის“, რომელთან თანამშრომლობითაც მარტის თვეში განსაკუთრებული შეთავაზებები გვექნება მეწარმე ქალების პროდუქტებზე, იმისთვის, რომ მომხმარებლებში გავზარდოთ მოტივაცია, სწორედ მეწარმე ქალების პროდუქციაზე შეაჩერონ არჩევანი. ამავდროულად კი, ჩვენი ინიციატივებით, სხვა კომპანიებსაც ვუბიძგებთ ჩართულობისკენ.
ერთი მხრივ, პროაქტიულად გვსურს, რომ „ველი“ ეთანამშრომლოს სხვა კომპანიებს, ხოლო მეორე მხრივ, ყოველთვის მზად ვართ ამ თემაზე კოლაბორაციისთვის. სამომავლო გეგმებშიც, კომპანიის მიზანია ქვეყნის ფარგლებს გასცდეს და ვფიქრობთ, რომ ამ მოგზაურობაში ჩვენი ყველა მეწარმე, მათ შორის ქალებიც, რა თქმა უნდა, ჩვენთან ერთად იქნებიან. კიდევ ერთი მნიშვნელოვანი გამოწვევა სხვა ბაზრებზე მეწარმე ქალების ექსპორტია და იმედი გვაქვს, სამომავლოდ ამ მიმართულებითაც განვვითარდებით.
როგორც უკვე ვახსენე, საზოგადოებაზე პოზიტიური გავლენის მოხდენა „ველის“ პოლიტიკის განუყოფელი ნაწილია და მომავალშიც აქტიურად გავაგრძელებთ მუშაობას ჩვენი მისიის სრულყოფისთვის. რაც მთავარია, თითოეული იდეა უშუალოდ გუნდიდან მოდის, შესაბამისად, ყველაფერი, რისი შეცვლაც და განხორციელებაც გვსურს, მაქსიმალურად ორგანულია და ჩვენი გუნდის თითოეულ წევრს სჯერა, რომ ქვეყანაში, ჩვენი მცდელობებით, პოზიტიური ძვრების გამოწვევა შეგვიძლია. S
