Moderna-ს ვაქცინა მოზარდებში 100%-ით ეფექტიანი აღმოჩნდა

25 მაისს გასაჯაროვებული კვლევის შედეგების თანახმად, Moderna-ს მიერ შექმნილი კორონავირუსის საწინააღმდეგო ვაქცინა 12-დან 17 წლამდე მოზარდებში მაქსიმალურად უსაფრთხო და ეფექტიანია. შესაბამისად, Pfizer-ის შემდეგ აღნიშნული კომპანიაც ყველა საჭირო საფეხურს გაივლის დასახელებულ ასაკობრივ ჯგუფზე დისტრიბუციის უფლების მოსაპოვებლად.

ცნობისთვის, კვლევაში მონაწილეობა აშშ-ში მცხოვრებმა 3 732-მა მოზარდმა მიიღო და ვაქცინის ორი დოზით აცრის შემდეგ მათგან არც ერთი არ დაინფიცირებულა. სწორედ ამიტომ, მისი ეფექტიანობა ხელთ არსებულ მონაცემებზე დაკვირვებით 100%-ით განისაზღვრა. გარდა ამისა, იმუნიზაციაში ჩართულ პირებს სერიოზული გვერდითი მოვლენები არ ჰქონიათ – მხოლოდ თავის ტკივილი, მოდუნება და კუნთების მსუბუქი ტკივილი.

Moderna აპირებს, რომ ივნისის დასაწყისში აშშ-ის საკვებისა და მედიკამენტის ადმინისტრაციას (FDA) მიმართოს ვაქცინის მოზარდებში გამოყენებასთან დაკავშირებით, რათა მათი ნაწილის აცრა ახალი სასწავლო წლის დაწყებამდე, სექტემბრამდე, მოესწროს.

FDA-მ Pfizer/BioNTech-ის ვაქცინის გამოყენების არეალი უკვე გააფართოვა 12-15 წლის მოზარდებისთვის. პარალელურად, ვრცელდება ინფორმაცია, რომ ორივე კომპანიას – Pfizer-საც და Moderna-საც – დაწყებული აქვთ ცდები, რომლებიც იმუნიზაციაში 6 თვიდან 11 წლამდე ბავშვების ჩართვას მოიაზრებს.

შეგახსენებთ, რომ ბავშვები შტატების პოპულაციის 20%-ს შეადგენენ. იმუნიტეტის გამოსამუშავებლად და პრე-პანდემიურ მდგომარეობაში დასაბრუნებლად აშშ-ს მოსახლეობის 70%-დან 85%-მდე აცრა სჭირდება, რაც იმას ნიშნავს, რომ მოზარდების ჩართულობა პროცესში უმნიშვნელოვანესია.

თავად Moderna ამერიკული ბიოტექნოლოგიური კომპანიაა, რომლის ვაქცინის ეფექტიანობაც 18 წელს ზემოთ ასაკის ადამიანებში 95%-ია.