ჩინური კორპორაცია Tencent-ის მფლობელმა მა ჰუატენმა Alibaba-ს დამფუძნებელ ჯეკ მას გადაუსწრო და ჩინეთში ყველაზე მდიდარი ადამიანი გახდა. Tencent-ის აქციების ღირებულება 14%-ით გაიზარდა მიმდინარე წელს, რაც ბოლო ორი წლის განმავლობაში ყველაზე მაღალი მაჩვენებელია. Tencent-ი ტექნოლოგიური კომპანიაა, რომელიც გასართობ ინტერნეტ პროგრამებს ქმნის. ამიტომაც კორონავირუსის პანდემიის დროს კი მისი აქციების ღირებულების ზრდა არც ყოფილა გასაკვირი.
ხუთშაბათის მონაცემებით, მა ჰუატენის ქონება $48.2 მილიარდს შეადგენს, მაშინ როდესაც 18 მარტის მონაცემებით, ის დაახლოებით 10 მილიარდით ნაკლები იყო. ჯეკ მას ქონება კი ბოლო მონაცემებით, $41.2 მილიარდია.
Tencent-ის პროდუქტებსა და სერვისებზე მოთხოვნა ჯერ კიდევ იანვრიდან გაიზარდა, მაშინ როდესაც ჩინეთში კარანტინი იყო. თუმცა, ახლა დაწესებული შეზღუდვების ნაწილი უკვე მოხსნილია, ამიტომაც გამორიცხული არ არის, რომ Tencent-ის ღირებულებამ ისევ კლება დაიწყოს.
იანვარში ჩინეთში დაწესებულმა კარანტინმა და სახლში დარჩენის მოწოდებამ ვიდეოთამაშების ბაზრის გააქტიურება გამოიწვია.
“ჩვენი პლატფორმები და პროდუქტები არასოდეს ყოფილა ისეთი საჭირო, როგორც სახლში დარჩენილი მომხმარებლებისთვის“, – განაცხადა Tencent-ის დამფუძნებელმა, რომელიც ასევე თავმჯდომარეობს და ხელმძღვანელობს კომპანიას.
Tencent-ის პირველი კვარტლის შემოსავლები 26%-ით გაიზარდა და დაახლოებით $15 მილიარდს მიაღწია. თუმცა, ანალიტიკოსები ვარაუდობენ, რომ მსგავსი კომპანიების შემოსავლების ზრდა დროებითია და მას შემდეგ რაც სკოლები და ოფისები გაიხსნება და ბოლომდე მოიხსნება შეზღუდვები, ადამიანები ნაკლებ დროს დაუთმობენ ე.წ “გეიმინგს“.
დატოვე კომენტარი
