ევროპის მასშტაბით არსებული მწვავე ენერგეტიკული კრიზისის დასაძლევად და რეკორდულად გაზრდილი ფასების საპასუხოდ, კანცლერ ოლაფ შოლცის მთავრობა 40 მილიარდი ევროს მოცულობის დახმარების პაკეტის დამტკიცებას გეგმავს.
მთავრობის მიზანი ნავთობისა და გაზის მკვეთრად გაძვირებით მოსახლეობაზე გაზრდილი ეკონომიკური წნეხის შემსუბუქება და რთულ ვითარებაში აღმოჩენილი მცირე ბიზნესების დახმარებაა.
პაკეტი მოიცავს როგორც საგადასახადო შეღავათებს, ასევე პირდაპირი დაფინანსების პროგრამებს, რაც, უმეტესწილად, ენერგეტიკისკენაა მიმართული.
საგულისხმოა, რომ რუსეთის ფედერაციიდან მომავალი ენერგოსაფრთხის ფონზე, გერმანიის მთავრობა აქტიურად ცდილობს სტრატეგიული რეზერვების შევსებას და მიწოდების ალტერნატიული წყაროების მოძიებას. გარდა ამისა, ენერგეტიკის სამინისტრო გაჩერებული თბო და ატომური ელექტროსადგურების ამოქმედების პერსპექტივასაც განიხილავს.
აღსანიშნავია, რომ ამჟამად გერმანიის მთავარი მილსადენი – Nord Stream 1 შეჩერებულია, რაც რუსული ენერგოგიგანტის, Gazprom-ის გადაწყვეტილებითაა განპირობებული.
დატოვე კომენტარი
