მოლდოვას უმსხვილესმა კომერციულმა ბანკმა Agroindbank-მა (MAIB), განაცხადა, რომ მისი ახალი CEO გიორგი შაგიძე იქნება. განცხადების თანახმად, შაგიძე ამ პოსტზე ბანკის სამეთვალყურეო საბჭომ უკვე დაამტკიცა. მის დამტკიცებას, ახლა ქვეყნის ცენტრალური ბანკის ნებართვა ესაჭიროება.
შაგიძე ამ პოსტის დაკავებამდე “თიბისი ბანკის” ფინანსური დირექტორი და გენერალური დირექტორის მოადგილე იყო. შაგიძე მადლობას უხდის სამეთვალყურეო საბჭოს მინიჭებული ნდობისთვის და ამბობს, რომ ის შეეცდება ბანკმა კიდევ უფრო გაიმყაროს პოზიციები ქვეყნის საკრედიტო ბაზარზე.
“მადლობას ვუხდი ბანკის სამეთვალყურეო საბჭოს, რომლებმაც ეს პასუხისმგებლობა მანდეს. მოველი ბანკის ლოიალურ და ნიჭიერ გუნდთან ერთად მუშაობას, რათა შევძლოთ საუკეთესოდ ვემსახუროთ ჩვენს კლიენტებს. ძირითადი აქცენტი გაკეთდება იმაზე, რომ ბანკს ჰქონდეს სათანადო ადამიანური, ტექნოლოგიური და კულტურული შესაძლებლობები, რათა ჩვენს კორპორატიულ, საცალო და SME კლიენტებს შევთავაზოთ მათთვის ყველაზე შესაფერისი პროდუქტები. ეს საშუალებას მოგვცემს უზრუნველვყოთ MAIB- ის ძლიერი ტრადიციების უწყვეტობა, მაგრამ ასევე ვიაროთ წინ და ვუპასუხოთ დღევანდელ სწრაფად ცვალებად და რთულ ბიზნეს გარემოში არსებულ საჭიროებებს,”- აცხადებს გიორგი შაგიძე.
გიორგი შაგიძეს საფინანსო სფეროში საქმიანობის 25-წლიანი გამოცდილება აქვს. TBC ბანკში მისი მუშაობის პერიოდში ბანკის ერთ-ერთი დიდი მიღწევა 2014 წელს ლონდონის საფონდო ბირჟაზე გასვლა და აქციათა პირველადი შეთავაზება იყო. ამასთანავე, შაგიძე TBC-ის უზბეკური შვილობილის CEO იყო. წარსულში ის ბრიტანულ Barclays-ში საქმიანობდა.
ცნობისთვის, MAIB არის უმსხვილესი ბანკი მოლდოვაში, მასზე ქვეყნის საბანკო აქტივების დაახლოებით 30% და სესხების დაახლოებით 35% მოდის. ბანკი მოლდოვას მოსახლეობის 20 პროცენტზე მეტს ემსახურება და ქვეყნის უმსხვილეს დამსაქმებელთა რიცხვს მიეკუთვნება. 2018 წლიდან, MAIB- ის უმსხვილესი აქციონერია HEIM Partners Limited, გაერთიანებული სამეფოს რეგისტრირებული კომპანია, რომელიც წარმოადგენს ინვესტორთა კონსორციუმს, რომელიც შედგება ევროპის რეკონსტრუქციისა და განვითარების ბანკის, Invalda INVL (აქტივების მართვის წამყვანი ჯგუფი ბალტიის ქვეყნებში) და Horizon Capital (კერძო ფონდი, რომელიც ორიენტირებულია განვითარებად ევროპის ბაზრებზე).
დატოვე კომენტარი
