კანადის ხელისუფლებასა და კომპანია Medicago-ს შორის გაფორმებული ხელშეკრულების თანახმად, ქვეყანა Covid 19-ის საწინააღმდეგო პოტენციური ვაქცინის 76 მილიონ დოზას მიიღებს.
კანადის პრემიერ-მინისტრის განცხადებით, ეს 38 მლნ ადამიანის აცრისთვის იქნება საკმარისი.
Medicago ბიოფარმაცევტული კომპანიაა, რომლის მთავარ მეწილეებს “ფილიპ მორის ინთერნეიშენალის” შვილობილი კომპანია Philip Morris Investments-ი და იაპონური კორპორაცია Mitsubishi Tanabe Pharma წარმოადგენენ.
კომპანიის სათაო ოფისი კვებეკში მდებარეობს. შესაბამისად, Medicago-ს მიერ შექმნილი პოტენციური ვაქცინა პირველი კანადური ვაქცინაა, რომელიც მთავრობამ შეისყიდა.
ნდობის გამოცხადებასთან ერთად, კანადის მთავრობა Medicago-ს მიერ ვაქცინის შექმნისა და მისი კლინიკური ცდების განხორციელების პროცესში 173 მილიონი კანადური დოლარის (დაახლობით, 133 მილიონი ამერიკული დოლარის) ინვესტიციის განხორციელებას გეგმავს.
“პროექტის ჯამური ბიუჯეტი 428 მილიონ დოლარს შეადგენს. ჩვენს მიერ განხორციელებული ინვესტიცია დაეხმარება Medicago-ს, კლინიკური კვლევების შედეგად გააუმჯობესოს შექმნილი ვაქცინა”, – განაცხადა მთავრობის წარმომადგენელმა.
კანადის მთავრობის გადაწყვეტილებას “ფილიპ მორის ინთერნეიშენალიც” გამოეხმაურა.
“უკეთესი შედეგების მიღწევა შესაძლებელია მაშინ, როდესაც მთავრობა და კომპანიები საყოველთაო კეთილდღეობის მისაღწევად ერთიანდებიან. ჩვენ მოხარული ვართ, რომ გვაქვს შესაძლებლობა, ხელი შევუწყოთ Medicago-ს ძალისხმევას შეიმუშავოს, გამოსცადოს და აწარმოოს COVID-19-ის ვაქცინა,” – განაცხადა PMI-ს გენერალურმა დირექტორმა ანდრე კალანცოპოლუსმა.
Medicago-მ პირველი ფაზის მოხალისეებზე ტესტირება 14 ივლისს დაიწყო და წინასწარი მონაცემებით, მეორე ფაზის ცდები 2020 წლის ნოემბერში გაგრძელდება. იმ შემთხვევაში, თუ მეორე ფაზაც წარმატებით დასრულდება, მესამე ფაზის დაწყება 2020 წლის დეკემბერში იგეგმება.
დატოვე კომენტარი
