Henley & Partners-ის Henley Global Citizens-ის კვლევის თანახმად, ამჟამად, კერძო კაპიტალის სიდიდით პირველ სამეულში შემავალი ქვეყნებია: აშშ, ჩინეთი და იაპონია. საინვესტიციო მიგრაციის (როდესაც მდიდარი ინვესტორები ალტერნატიულ ან მეორე მოქალაქეობას იძენენ, მასპინძელ ქვეყანაში ინვესტიციების სანაცვლოდ) თვალსაზრისით ყველაზე მიმზიდველი ინდოეთი, აშშ და გაერთიანებული სამეფოა. ბოლო ორ წელიწადში კაპიტალისა და საინვესტიციო მიგრაციის ორი ძირითადი მამოძრავებელი კოვიდი და კლიმატური ცვლილება აღმოჩნდა. აღნიშნულ ორ „კ“-ს („კ“ოვიდი და „კ“ლიმატი) 2022 წელს მესამე „კ“-ც დაემატა – კონფლიქტი ევროპაში.
10 უმდიდრესის სიის ლიდერი კვლავაც აშშ-ია
მსოფლიო სიმდიდრის 32%-ით და მსოფლიო მილიონერთა (მსხვილი კერძო კაპიტალის მფლობელი პირები) 36% სწორედ შეერთებულ შტატებშია თავმოყრილი. ქვეყანაში არსებული კერძო სიმდიდრე ჯამში 68.8 ტრილიონ აშშ დოლარს უტოლდება. ამასთან, სწორედ შტატებში იყო შარშან მსხვილი კერძო კაპიტალის მფლობელთა ყველაზე მაღალი, 10%-იანი ზრდა, 10 უმდიდრეს ქვეყანას შორის. ჩინეთში, რომელიც უმდიდრესთა ათეულში მეორე ადგილზეა, შტატების კერძო სიმდიდრის მხოლოდ მესამედია – 23.3 ტრილიონი აშშ დოლარი. რაც შეეხება ჩინეთის მსხვილი კერძო კაპიტალის მფლობელთა ზრდას, შარშან ეს რიცხვი შედარებით მოკრძალებულად, 4%-ით გაიზარდა. თუმცა, 10-წლიან პროგნოზში, შტატების მსხვილი კერძო კაპიტალის მფლობელთა მატება 20%-ით არის მოსალოდნელი, ხოლო ჩინეთის – 50%-ით. ათეულში მესამე იაპონიაა. ამომავალი მზის ქვეყნის კერძო სიმდიდრე 20.1 ტრილიონ აშშ დოლარად არის შეფასებული. შარშან, იაპონიის მსხვილი კერძო კაპიტალის მფლობელთა რაოდენობა 3%-ით გაიზარდა. მეტად შთამბეჭდავია ამ მხრივ 10-წლიანი პროგნოზი, სადაც მოსალოდნელი ზრდა 30%-ია.
უმდიდრესი ქვეყნების ათეულს ავსებენ: ინდოეთი, გერმანია, გაერთიანებული სამეფო, კანადა, საფრანგეთი და იტალია.
საინვესტიციო მიგრაციის მამოძრავებლები ინდოელი ინვესტორები არიან
Henley Global Citizens-ის ანგარიშის თანახმად, კომპანიის მიერ ინდოელი ინვესტორებისგან ალტერნატიულ მოქალაქეობაზე მიღებული განაცხადები, 2021 წელს 54%-ით გაიზარდა, 2020 წელთან შედარებით. თავად 2020-ში ზრდა 63%-იანი იყო. სიაში მეორე ადგილზე ამერიკელი ინვესტორები არიან. 2021 წელს კომპანიაში აშშ-ს მოქალაქე ინვესტორების მხრიდან მოთხოვნა 26%-ით გაიზარდა, 2020 წელთან შედარებით. რაც შეეხება პანდემიურ 2020-ს აქ ზრდა 208%-იანი იყო. ბრიტანელი და სამხრეთ აფრიკელი ინვესტორების მხრიდან 2021 წელს განაცხადები 110% და 38%-ით გაიზარდა.
საინვესტიციო მიგრაციის ზრდაში დიდი წვლილი ითამაშა პანდემიამ, აცხადებს იურგ შტეფანი, Henley & Partners-ის აღმასრულებელი დირექტორი. მისი თქმით, „ბოლო ორი წლის მანძილზე ბევრმა ქვეყანამ შექმნა ახალი პროგრამები ან გააუმჯობესა არსებული, მაღალი შემოსავლის მქონე პირების, ინვესტორების ან ნიჭიერი ინდივიდების მოსაზიდად. მსგავსი ახალი რეზიდენტების ან მოქალაქეების მოზიდვას დიდი სარგებელი მოაქვს. კერძოდ, საინვესტიციო მიგრაციის პროგრამები ინვესტორებს საშუალებას აძლევს გაზარდონ თავიანთი სუვერენული კაპიტალი. თავად ქვეყნები, რეზიდენტობის ან მოქალაქეობის საინვესტიციო პროგრამით იუმჯობესებენ საჯარო საფინანსო მდგომარეობას და ხელს უწყობენ ეკონომიკურ ზრდას, ქმნიან სამუშაო ადგილებს და ამ ყველაფერს ყოველგვარი ზედმეტი სესხის გარეშე ახერხებენ. ამჟამინდელი კრიზისების პირობებში, რამაც შეანელა მსოფლიო ეკონომიკა და გავლენა მოახდინა მრავალი ქვეყნის ფისკალურ ბალანსზე, გასაკვირი არ არის, რომ საინვესტიციო მიგრაციის მიმართ ინტერესი იზრდება. საინვესტიციო მიგრაცია თანაბრად მომგებიანია როგორც სუვერენული სახელმწიფოსთვის, ასევე ინვესტორისთვის“, განაცხადა შტეფანმა.
დატოვე კომენტარი
