კრედიტინფოს უკანასკნელი ანგარიშის თანახმად, 2023 წლის ოქტომბრის მონაცემებით, ქვეყანაში აქტიური მსესხებლების რაოდენობა 1.93 მილიონ ადამიანს შეადგენს. მათგან ყველაზე დიდი წილი, 82%, ბანკებთან გაფორმებულ საკრედიტო ვალდებულებებზე მოდის. მსესხებელთა 17%-ს საკრედიტო ვალდებულება საქართველოს ეროვნული ბანკის მიერ რეგულირებად ფინანსურ ინსტიტუტებთან, 1%-ს კი სალიზინგო კომპანიებთან აქვს.
გასული თვის მონაცემებით, აქტიური კონტრაქტების ჯამურმა საკრედიტო ვალდებულებამ 42.98 მილიარდი ლარი შეადგინა. აღნიშნული საკრედიტო ვალდებულებების 91% კი ბანკების მიერ გაცემულ სესხებზე მოდის.
საინტერესოა ისიც, რომ მარტის მონაცემებთან შედარებით, ოქტომბრის ბოლოსთვის მსესხებელთა ბაზა 39,080 ადამიანით შემცირდა.
რაც შეეხება ვადაგადაცილებულ კონტრაქტებს, 1 წლამდე ვადით ვადაგადაცილებული კონტრაქტების მოცულობა 1.15 მილიარდ ლარს შეადგენს. 2-დან 3 წლამდე ვადით ვადაგადაცილებული კონტრაქტების მოცულობა კი 1 მილიარდი ლარია.
