ამერიკული ფარმაცევტული კომპანია Pfizer-ის წარმომადგენლების ინფორმაციით, მათ მიერ შექმნილი კორონავირუსის სამკურნალო აბი ჰოსპიტალიზაციის რისკს 89%-ით ამცირებს. მწარმოებლის განცხადებით, პრეპარატის ეფექტიანობის კლინიკური ტესტირების ადრეულ ეტაპზევე გამოვლენიდან გამომდინარე, ის ცდებს წყვეტს, ვინაიდან მედიკამენტი COVID-19-ით დაავადებულთათვის რაც შეიძლება სწრაფად იყოს ხელმისაწვდომი.
კომპანიის წარმომადგენლების თქმით, ანტივირუსულმა აბმა, რომელიც HIV-ის სამკურნალო წამლის, რიტონავირის მცირე დოზასთან ერთად გამოიყენეს, დადებითი შედეგი რისკ-ჯგუფში შემავალ პაციენტებში აჩვენა. Pfizer-ს კლინიკური კვლევის შედეგების შესახებ დეტალური ინფორმაცია ჯერჯერობით არ გამოუქვეყნებია, თუმცა კომპანიაში აცხადებენ, რომ პრეპარატის ავტორიზაციისთვის ამერიკის შეერთებული შტატების სურსათისა და მედიკამენტების ხარისხის კონტროლის სააგენტოს (FDA) რაც შეიძლება მალე მიმართავენ.
“კვლევისას მიღებული მონაცემები მოწმობს, რომ თუკი მარეგულირებელი ორგანოები ჩვენ მიერ შექმნილ კოვიდის სამკურნალო აბს დაამტკიცებენ, მას ექნება პოტენციალი, უამრავი პაციენტის სიცოცხლე იხსნას და დაავადების მძიმე ფორმით განვითარებისა და ჰოსპიტალიზაციის რისკი 10-დან 9 შემთხვევაში შეამციროს”, – განაცხადა Pfizer-ის აღმასრულებელმა დირექტორმა, ალბერტ ბურლამ.
შეგახსენებთ, რომ ახლახან დიდი ბრიტანეთი მსოფლიოში პირველი სახელმწიფო გახდა, რომელმაც კორონავირუსის სამკურნალო აბი დაამტკიცა. ეს ამერიკული ფარმაცევტული კომპანიების – Merck-ისა და Ridgeback Biotherapeutics-ის თანამშრომლობით შექმნილი პრეპარატი მოლნუპორავირია, რომელიც, ბოლო კვლევის თანახმად, ჰოსპიტალიზაციის რისკს 50%-ით ამცირებს. ამჟამად მწარმოებელი აბის გამოყენებისთვის ნებართვის FDA-სგან ელის. როგორც ცნობილია, სააგენტოს წარმომადგენლები აღნიშნულ საკითხის განსახილველად შეხვედრას 30 ნოემბერს გამართავენ.
დატოვე კომენტარი
