საგარეო ვაჭრობის თავისუფლებით საქართველო მსოფლიოში მე-9 ადგილზეა

Heritage Foundation-ის ეკონომიკური თავისუფლების ინდექსის მიხედვით, საგარეო ვაჭრობის თავისუფლებით საქართველო მსოფლიოში მე-9 ადგილზეა, 88.6 ქულით (მაქსიმალური ქულაა 100).

საგარეო ვაჭრობის თავისუფლება 2 კრიტერიუმით განისაზღვრება: ტარიფების დონე ვაჭრობაში (ექსპორტ-იმპორტში) და არასატარიფო ბარიერების არსებობა. საქართველოს საშუალო საიმპორტო ტარიფი 0.7%-ია, რაც საკმაოდ დაბალია. დაბალი მაჩვენებელი განპირობებულია იმით, რომ საქართველოს უმეტეს ძირითად სავაჭრო პარტნიორ ქვეყნებთან თავისუფალი ვაჭრობის ხელშეკრულებები აქვს.

არასატარიფო ბარიერები მოიცავს რაოდენობრივ და ხარისხობრივ შეზღუდვებს ვაჭრობაში, მაგალითად, როგორიცაა: რაოდენობრივი ქვოტები, ტექნიკური ბარიერები, ლიცენზიები, ნებართვები, ანტიდემპინგური ღონისძიებები, ემბარგო და სხვა. საქართველოში არასატარიფო ბარიერების დონეც საკმაოდ დაბალია და იშვიათ შემთხვევებში არის გამოყენებული.

თავისუფალი საგარეო ვაჭრობა ქვეყნის ეკონომიკის ზრდის და განვითარების ხელშემწყობი ფაქტორია.

ცხრილი: მსოფლიოს ტოპ 10 ქვეყანა საგარეო ვაჭრობის თავისუფლებით:

ადგილი მსოფლიოში	ქვეყანა	ქულა (მაქსიმალურია 100)
1	ლიხტენშტეინი	90.0
2	შვეიცარია	90.0
3	ჰონგ კონგი	90.0
4	სინგაპური	90.0
5	მაკაუ	90.0
6	ბრუნეი	89.1
7	სვაზილენდი	88.9
8	მავრიკი	88.7
9	საქართველო	88.6
10	კანადა	88.4