საქართველოს სტატისტიკის ეროვნულმა სამსახურმა ქვეყანაში საქონლით საგარეო ვაჭრობის წინასწარი მონაცემები გამოაქვეყნა. საქსტატის ინფორმაციით, 2023 წლის იანვარ-აგვისტოში საქართველოს საგარეო ვაჭრობის ბრუნვა წინა წლის ანალოგიურ პერიოდთან შედარებით 16.8%-ით გაიზარდა და $14 მილიარდს გადააჭარბა.
მიმდინარე წლის იანვარ-აგვისტოში, 2022 წლის შესაბამის პერიოდთან შედარებით, გაზრდილია როგორც ექსპორტის, ასევე იმპორტის მაჩვენებლები. სავაჭრო ბრუნვაში ექსპორტის წილი $4.08 მილიარდს, ხოლო იმპორტი – $9.93 მილიარდს გაუტოლდა. შედეგად, გასული წლის ანალოგიურ მაჩვენებელთან შედარებით, ექსპორტის ზრდამ 14.4%, ხოლო იმპორტის ზრდამ – 17.8% შეადგინა.
საქსტატის მონაცემებით, 2023 წლის პირველ რვა თვეში, საქართველოს უარყოფითმა სავაჭრო ბალანსმა $5.8 მილიარდს გადააჭარბა, რაც საგარეო სავაჭრო ბრუნვის 41.7%-ია.
2023 წლის იანვარ-აგვისტოში ათი უმსხვილესი სავაჭრო პარტნიორი ქვეყნის წილმა საქართველოს მთლიან საგარეო სავაჭრო ბრუნვაში 68.7% შეადგინა. ქვეყნის უმსხვილესი სავაჭრო პარტნიორები არიან: თურქეთი ($1.944 მლრდ), რუსეთი ($1.686 მლრდ) და აშშ ($1.240 მლრდ).
საქართველოდან თურქეთში ექსპორტირებული უმსხვილესი სასაქონლო ჯგუფებიდან პირველ ადგილზეა ელექტროენერგია ($84,782), შემდეგ მოდის ტრიკოტაჟის ნაწარმი ($42,993). რაც შეეხება საქართველოში თურქეთიდან იმპორტირებულ უმსხვილეს სასაქონლო ჯგუფებს, ამ შემთხვევაში, პირველ-მეორე ადგილებზე დაფასოებული სამკურნალო საშუალებები ($92,650) და მსუბუქი ავტომობილები ($71,409) მოდის.
რუსეთის შემთხვევაში, საქართველოდან რუსეთში ექსპორტირებული უმსხვილესი სასაქონლო ჯგუფებია ყურძნის ნატურალური ღვინოები ($112,112) და მსუბუქი ავტომობილები ($66,642), ხოლო რუსეთიდან საქართველოში იმპორტირებული უმსხვილესი სასაქონლო ჯგუფებია ნავთობი და ნავთობპროდუქტები ($435,049), ნავთობის აირები და სხვა აირისებრი ნახშირწყალბადები ($96,360).
რაც შეეხება საქართველოს მესამე უმსხვილეს სავაჭრო პარტნიორს, ამერიკის შეერთებულ შტატებს, 2023 წლის იანვარ-აგვისტოში აშშ-ში ექსპორტირებული სასაქონლო ჯგუფებიდან უმსხვილესი ფეროშენადნობები ($30,765) იყო, მეორე ადგილზე კი ყურძნის ნატურალური ღვინოები ($3,464). ხოლო ამავე პერიოდში, აშშ-დან საქართველოში იმპორტირებული უმსხვილესი სასაქონლო ჯგუფი $1.117 მილიარდით მსუბუქი ავტომობილები გახდა.
საქართველოს უმსხვილესი სავაჭრო პარტნიორი ქვეყნები 2023 წლის იანვარ-აგვისტოში:
- თურქეთი – $1.943 მლრდ – 13.9%
- რუსეთი – $1.686 მლრდ – 12.0%
- აშშ – $1.239 მლრდ – 8.9%
- ჩინეთი – $1.096 მლრდ – 7.8%
- აზერბაიჯანი – $979 მლნ -7%
- სომხეთი – $811 მლნ – 5.8%
- გერმანია – $641 მლნ – 4.6%
- ყაზახეთი – $446 მლნ – 3.2%
- ყირგიზეთი – $416 მლნ – 3%
- იაპონია – $356 მლნ – 2.5%
