სახელმწიფო ხაზინის ინფორმაციით, საქართველოს შრომის, ჯანმრთელობისა და სოციალური დაცვის სამინისტროს 2017 წლის ბიუჯეტის გეგმა 2 მილიონი ლარით გაიზარდა და ჯამში 3 418 მილიონი ლარია. ზრდა ძირითადად ჯანდაცვის პროგრამების დაფინანსებამ განაპირობა, რომელთა დაფინანსება ჯამში 41 მილიონი ლარით გაიზარდა. აღნიშნული თანხიდან 40 მილიონი საყოველთაო ჯანდაცვის პროგრამას დაემატა. ამ ეტაპზე საყოველთაო ჯანდაცვის პროგრამის ბიუჯეტში 35 მილიონი ლარი დარჩა დასახარჯი, რაც წლის ბოლომდე საკმარისი იქნება.
საყოველთაო ჯანდაცვის დაფინანსება სოციალური დახმარების პროგრამებში გაკეთებული ეკონომიის ხარჯზე გაიზარდა. აღსანიშნავია ისიც, რომ 2017 წლის ბიუჯეტის კანონში ცვლილება პარლამენტმა გასულ კვირას დაამტკიცა, სადაც აღნიშნული ცვლილება ასახული არ იყო.
2018 წლის ბიუჯეტში საყოველთაო ჯანდაცვის პროგრამაზე 704 მილიონი ლარია გამოყოფილი, რაც დიდი ალბათობით, საკმარისი არ იქნება და მომავალი წლის ბოლოსაც დაფინანსების ზრდის აუცილებლობა დადგება.
2017 წელს 2 მილიონი ლარით გაიზარდა პროგრამების მართვის ანუ ადმინისტრაციული (ბიუროკრატიული) ხარჯი.
ცხრილი1. ჯანდაცვის სამინისტროს 2017 წლის ბიუჯეტის პირვანდელი და შეცვლილი გეგმები
ბიუჯეტის მუხლები | პირვანდელი გეგმა | შეცვლილი გეგმა | სხვაობა |
სამინისტროს ბიუჯეტი სულ | 3416 | 3418 | 2 |
პროგრამების მართვა | 49 | 51 | 2 |
პენსია და სოციალური დახმარება | 2438 | 2403 | -35 |
პენსია | 1680 | 1686 | 6 |
სოციალური დახმარება | 680 | 651 | -29 |
სოციალური რეაბილიტაცია და ბავშვზე ზრუნვა | 23 | 24 | 1 |
სოციალური შეღავათები მაღალმთიან მოსახლეობაში | 55 | 42 | -13 |
ჯანდაცვა | 894 | 935 | 41 |
საყოველთაო ჯანდაცვა | 660 | 700 | 40 |
საზოგადოებრივი ჯანდაცვა | 84 | 77 | -7 |
სამედიცინო მომსახურება პრიორიტეტულ სფეროებში | 149 | 157 | 8 |
სამედიცინო დაწესებულებათა რეაბილიტაცია და | 30 | 26 | -4 |
შრომისა და დასაქმების სისტემის რეფორმების პროგრამა | 4 | 4 | 0 |
წყარო: ფინანსთა სამინისტრო და სახელმწიფო ხაზინა
დატოვე კომენტარი
