საქართველოს ბანკმა საერთაშორისო, პრესტიჟული გამოცემა Global Finance-ისგან მორიგი აღიარება მოიპოვა. გამოცემამ ბანკი ცენტრალური და აღმოსავლეთი ევროპის მასშტაბით მომხმარებლებისთვისა და კორპორაციებისთვის 2023 წლის საუკეთესო ციფრულ ბანკებს შორის დაასახელა და 20 კატეგორიაში გამარჯვებულად გამოაცხადა.
აღსანიშნავია, რომ ოც კატეგორიას შორის საქართველოს ბანკი საუკეთესოდ დასახელდა მობილბანკისა და ბიზნეს მობილბანკის კუთხით, ამასთან, კომპანიამ რეგიონში ყველაზე ინოვაციური და ტრანსფორმაციულ ბანკის ტიტულიც მოიპოვა.
Global Finance-ის აღიარების, მანამდე განვლილი გზისა და სამომავლო გეგმების შესახებ საქართველოს ბანკის ინტერნეტ და მობილბანკის ლიდი, ლუკა ქობალია საუბრობს.
რას ნიშნავს ჯილდო ბანკისა და მისი მომხმარებლებისთვის?
„საუკეთესო მობილბანკის კატეგორიაში გამარჯვება ჩვენი ბანკისთვის მნიშვნელოვანი აღიარებაა, რაც ჩვენი გუნდის შრომისმოყვარეობის, ინოვაციურობისა და პროდუქტისადმი ერთგულების დასტურია. ეს ჯილდო ჩვენთვის ხსნის ახალ სტრატეგიულ შესაძლებლობებს. ჩვენი მომხმარებლებისთვის კი, აღიარება მიანიშნებს ორგანიზაციისადმი ნდობის მაღალ დონეზე, რომელსაც ისინი ჩვენი პროდუქტების გამოყენებისას იმყარებენ“, — განმარტავს ლუკა.
მისი თქმით, აღიარება კიდევ ერთი დასტურია იმისა, რომ საქართველოს ბანკის მომხმარებლები იყენებენ წამყვან ციფრულ პროდუქტებს, ეს პროდუქტები კი, თავის მხრივ, უსაფრთხო, ინოვაციურ და საუკეთესო საბანკო გამოცდილებას უზრუნველყოფს.
„ჯილდო ხაზს უსვამს ჩვენს ურყევ ერთგულებას ჩვენი მომხმარებლების მოთხოვნილებებისადმი და გვაძლევს მოტივაციას, გავაგრძელოთ სრულყოფილებისკენ სწრაფვა“.
რა გზა გაიარა მობილბანკმა აღიარებამდე?
ლუკა ქობალიას თქმით, საუკეთესო მობილბანკის ტიტულამდე განვლილი გზა სტრატეგიული ხედვის, ინოვაციებისა და პროდუქტის თანამედროვე დეველოპმენტის პრაქტიკებისადმი ერთგულებით გამოირჩეოდა.
„საწყისი კონცეფციიდან საბოლოო პროდუქტამდე ყოველი ნაბიჯი ჩვენი მომხმარებლების საჭიროებების დეტალური ანალიზითა და მობილური ტექნოლოგიების მეშვეობით, საბანკო მომსახურების სრული გადააზრების ამბიციით იყო ნაკარნახევი. ჩემი აზრით, ამ წარმატების მთავარი მიზეზი სხვადასხვა დეპარტამენტსა და კომპეტენციას შორის ძლიერი კოლაბორაციაა, ამასთან, ფინანსურ, იურიდიულ, დიზაინის, დეველოპმენტის, ბიზნესისა და მარკეტინგის მიმართულებებს შორის უწყვეტი სინერგია“, — აღნიშნავს ლუკა და ამატებს, რომ გადამწყვეტი როლი ითამაშა მულტიფუნქციურმა გუნდმაც, სადაც, მისი თქმით, რთული გამოწვევების გადასაჭრელად, სხვადასხვა ნიჭი და პერსპექტივა ერთმანეთს ერწყმის.
„სწორედ ამ თანამშრომლების სულისკვეთებამ გამოიწვია ჩვენი მობილბანკის საერთაშორისო აღიარება“.
სტრატეგიული რეფორმები წარმატების უკან
Global Finance-ის მიერ საქართველოს ბანკის 20 კატეგორიაში აღიარება ბანკის სტრატეგიული რეფორმების შედეგია. მათ შორის განსაკუთრებული როლი უჭირავს დიზაინ სისტემას, რომელიც ციფრულ პლატფორმებზე ესთეტიკას და ფუნქციონალების ჰარმონიას უზრუნველყოფს, ასევე მომხმარებელზე ორიენტირებულ მიდგომას ამყარებს.
„ჩვენ შევცვალეთ პროდუქტების განვითარების კულტურა დიზაინ აზროვნების (Design Thinking) ირგვლივ, გავაძლიერეთ მომხმარებლის მიმართ აქცენტი და ფოკუსი რეალური პრობლემების გადაჭრაზე გადავიტანეთ. გარდა ამისა, პროდუქტების გუნდებს ავტონომია მივეცით, რათა მომხმარებლის საუკეთესო ღირებულება შექმნან. ამ ინტეგრირებულმა მიდგომამ გადამწყვეტი როლი ითამაშა ჩვენს მიღწევებში და განამტკიცა ჩვენი ლიდერობა ცენტრალურ და აღმოსავლეთ ევროპაში“, — ამბობს ლუკა.
მისი თქმით, საქართველოს ბანკი ამჟამად ქვეყანაში ციფრული ინოვაციების წამყვან ძალას წარმოადგენს, ამას კი მნიშვნელოვანი სტატისტიკა ადასტურებს.
„ჩვენს მობილურ აპლიკაციას თვეში მილიონზე მეტი მომხმარებელი იყენებს, რაც საქართველოში ყოველდღიური ფინანსური ცხოვრების განუყოფელ ნაწილად გვაქცევს. ასევე ასაბუთებს, რომ მობილბანკი საქართველოში ყველაზე ხშირად გამოყენებადი ციფრული პროდუქტია ქართულ პლატფორმებს შორის და არა მხოლოდ“.
საქართველოს ბანკის სამომავლო გეგმები ამბიციურია
„ჩვენი ხედვით, მობილბანკი გადაიქცევა ცენტრალურ ჰაბად მომსახურების ფართო სპექტრისთვის და მისი მიზანი იქნება, მომხმარებლებისთვის ყოველდღიური ამოცანები უფრო მოსახერხებელი და ინტეგრირებული გახდეს. ჩვენი სტრატეგია დაფუძნებულია ინოვაციაზე, მომხმარებლის განსაკუთრებულ გამოცდილებასა და სერვისების გაფართოებაზე, რაც ტრადიციულ ბანკინგს სცილდება. ეს ასახავს ჩვენს პირობას, ვიყოთ არა მხოლოდ ბანკი, არამედ მომხმარებლების პარტნიორი ყოველდღიური შესაძლებლობების აღმოჩენის გზაზე“.
დატოვე კომენტარი
