თიბისის მხარდაჭერით „ჯეოლაივი“ საქართველოში ზეთისხილის წარმოებას აფართოებს

ზეთისხილის ბიზნესის მზარდი განვითარების ფონზე, 12 წლის თავზე, კომპანია „ჯეოლაივის“ წარმომადგენლებმა წელს, თიბისის მხარდაჭერით, დამატებით 45 ჰა მიწის განაშენიანება გადაწყვიტეს.

ზეთისხილის – ამ კეთილშობილი მცენარის დიდი ხნის შემდეგ საქართველოში დაბრუნება თურქეთში მცხოვრები ქართველების სახელებს უკავშირდება.

როცა აჰმეთ ქაჰრამანმა (აჰმეთ გოგროჭაძე), მეჰმეთ ნური თაიარიმ (მამია დუმბაძე) და ალი სამი ოზელმა ქვეყნისთვის სასარგებლო და მნიშვნელოვანი საქმის წამოწყება გადაწყვიტეს, არჩევანი სწორედ საქართველოში ზეთისხილის მოშენებაზე შეჩერდა.

2010 წელს, ამ საქმეში უკვე გამოცდილმა ბიზნესმენებმა ქართველ პარტნიორთან, გიორგი სვანიძესთან ერთად, საქართველოში კომპანია „ჯეოლაივი” დააფუძნეს და რამდენიმე რეგიონში – კახეთში, იმერეთში, გურიასა და ქვემო ქართლში – ზეთისხილის საცდელი მეურნეობები გააშენეს.

მცენარემ სამივე რეგიონში იხარა, თუმცა ყველაზე ნაყოფიერი ზეთისხილისთვის კახეთის ნიადაგი აღმოჩნდა, სადაც 5 წლის თავზე „ჯეოლაივმა“ 100 ჰა ბაღიდან პირველი მოსავალი – 60 ტ. ზეთისხილი აიღო. ნაყოფის ხარისხმა და რაოდენობამ ცხადი გახადა, რომ ზეთისხილის წარმოებას საქართველოში პერსპექტიული საქმე იყო, ამიტომ კომპანიამ ზეთისხილის გადამამუშავებელი საწარმოს აშენება გადაწყვიტა.

„ზეთისხილის გადამამუშავებელი საწარმო 2016 წელს, კახეთში, 3300 კვმ ტერიტორიაზე ავაშენეთ. დამფუძნებლებს ამ საქმეში უკვე საკმაო გამოცდილება ჰქონდათ დაგროვილი თურქეთიდან, შესაბამისად, საწარმოს აღჭურვა და გამართვა არ გაგვჭირვებია. მოსავალი ყოველწლიურად იმატებს, შარშან 120 ტონა ავიღეთ, წელს კი უფრო მეტს ველოდებით. წარმოებული პროდუქტი – ზეთისხილის ზეთი – პირველივე მოსავლით ძალიან ხარისხიანი გამოვიდა და იმავე წელს შევედით ქართულ ბაზარზე. გარდა საკუთარი მოსავლის გადამუშავებისა, საწარმო ემსახურება ასევე სხვა ფიზიკურ თუ იურიდიულ პირებსაც, რომლებმაც აქტიურად მიჰყვეს ხელი ზეთისხილის წარმოებას. ზეთის გარდა, წელს დავამზადეთ შავი და მწვანე ზეთისხილის მარინადიც, რომელიც ერთ თვეში შევა ბაზარზე“, – ამბობს კომპანია „ჯეოლაივის“ დირექტორი, ნელი გეთიაშვილი.

განსაკუთრებული სიახლე კი კახეთში სანერგე მეურნეობის მშენებლობაა, რომელსაც „ჯეოლაივი“ თიბისის მხარდაჭერით იწყებს:

„ვგეგმავთ, თურქეთიდან შემოვიტანოთ ზეთისხილის „დედა ხე“, რომლიდანაც საქართველოში გამოვიყვანთ ზეთისხილის ნერგს. ყოველწლიურად კი ზეთისხილს დაემატება სხვა ნერგებიც – კაკალი, ნუში, ყველანაირი ხეხილი, რაც საქართველოში ხარობს. სანერგისთვის გამოყოფილია 2 ჰა ტერიტორია, რომელიც 1 წლის განმავლობაში გაშენდება“, – ამბობს ნელი გეთიაშვილი.

ამჟამად „ჯეოლაივში“ მუდმივად დასაქმებულია 10 ადამიანი, მათი რიცხვი სეზონურად 200-მდე იზრდება.

ქართული წარმოების, უმაღლესი ხარისხის ზეთი უკვე საკმაოდ წარმატებული პროდუქტია, რომელიც „კარფურის“, „გუდვილის“, „აგროჰაბის“ თუ „ნიკორას“ დახლებზე წლების წინ გამოჩნდა და კონკურენციას უწევს იმპორტულ, მაღალი ხარისხის სხვადასხვა წარმოების ზეთს.

მომავალში „ჯეოლაივი“  ბაზარზე ზეთისხილის ბაზაზე დამზადებული კოსმეტიკური საშუალებების შემოტანასაც გეგმავს.